ӨМНӨД СОЛОНГОС ДӨРӨВ ДЭХ ӨДРӨӨ ГАЛ ТҮЙМЭРТЭЙ ТЭМЦЭЖ БАЙНА

Үндэсний хэмжээнд гамшгийн байдал зарлаад байгаа БНСУ дөрөв дэх өдрөө ой хээрийн түймэртэй тэмцэж байна. Сүүлийн үеийн мэдээллээр БНСУ-ын зүүн өмнөд бүсээс хүчтэй салхины нөлөөгөөр асар хурдтай тархсан түймэрт 4 хүн амиа алдаж, 6 хүн хүнд түлэгдээд байна. Түймэр өнгөрсөн баасан гарагт Сөүл хотоос 250 км-ийн зайд орших Санчонг хошуунаас эхэлж бусад бүс нутгуудад тархсан. Одоогоор 1,500 гаруй оршин суугчийг аюулгүй бүс рүү нүүлгэн шилжүүлсэн гэж гамшгаас хамгаалах албаныхан мэдэгджээ. Мөн 3,286.11 га газар буюу 4,600 гаруй хөлбөмбөгийн талбайтай тэнцэхүйц газар нутаг түймэрт өртөөд байна. Түүнчлэн цаг агаарын хуурай нөхцөлд түймэр маш хурдацтай тархаж бүрэн унтраахад хүндрэлтэй байгаа ч бүх хүчээ дайчлан хурдан унтраана гэж албаныхан мэдэгджээ.