ШВЕЙЦАР: 7-Р САРЫН 1-ЭЭС ЭХЛЭН ЖОЛООНЫ ШАЛГАЛТЫН АСУУЛТУУД НЭМЭГДЭНЭ

Энэ оны 7 сарын 1-нээс эхлэн Швейцарын жолооны курс ууд тээврийн хэрэгслийн автоматжуулсан системийн бүлэг хичээлийг нэмэлтээр үзэж шалгалтын материалд оруулахаар болжээ. Тус журам нь суудлын автомашин B, BE, B1 ангилал болон мотоциклийн А, А1 ангилалд хамаарагдах юм байна. Энэ нь Швейцарт жолооны үнэмлэх авах хүсэлтэй хүмүүс хуучин шалгалтын асуултуудаас гадна автоматжуулалтын системийн мэдлэгээ онол болон практикийн шалгалтаар нотлох ёстой. Тодруулбал сүүлийн үеийн авто машинууд маш олон ухаалаг автомат функцтэй болсон. Тиймээс жолооч тэдгээрийг зөв ашиглах, тээврийн хэрэгсэл эзэмшилтийг сайжруулах ач холбогдолтой гэж үзэж байгаа юм.

Түүнчлэн L-drive Switzerland жолооны багш нарын нэгдсэн холбооны ерөнхийлөгч Майкл Геркен "Blick" сэтгүүлд өгсөн ярилцлагадаа ирээдүйд автомашин болон мотоциклийн жолооч нар төрөл бүрийн ухаалаг функц, автоматжуулалтын системийг ойлгож, тэдгээрийг зөв ашиглах мөн эрсдэлийг мэддэг байх нь маш чухал. Онол практикийн хичээлийн хувьд жолооны багш нар оюутнуудаа автомат системийн удирдлагыг ашиглахад бэлтгэх хичээлүүдийг баталсан гэжээ.