ШВЕДЭД СУРГУУЛЬ ОРЧМЫН ХҮЧИРХИЙЛЛИЙН ТОО СҮҮЛИЙН 10 ЖИЛД 150%-ААР ӨСЧЭЭ

Өнгөрсөн 2-р сарын 4-нд Шведийн Campus Risbergska насанд хүрэгчдийн боловсролын төвд 10 хүнийг буудан хөнөөсөн хэрэг гарсан. Тэгвэл Шведийн засгийн газар нийт сургуулиудын аюулгүй байдлыг сайжруулах зорилгоор 300 сая крон буюу 27 сая еврогийн төсөв баталсан талаар тус улсын боловсролын сайд мэдээлээ.

Сургуулийн бүс газрыг бүрэн камержуулах, аюулгүйн шалган нэвтрүүлэх цэгүүд суурилуулах, онцгой байдлын үед сургууль бүр аюулгүй байдлыг хангах төлөвлөгөөг боловсруулан батлах зэрэг ажлуудын хийхээр төлөвлөжээ.

Түүнчлэн Шведэд сургууль орчмын хүчирхийлэл сүүлийн 10 жилд 150 хувиар өссөн гэдгийг салбар яамнаас онцоллоо. Жишээлбэл 2022 оны 3-р сард Мальмё хотын ахлах сургуульд 18 настай сурагч 2 багшийг хутгалж хөнөөсөн. 2022 оны 1-р сард 16 настай хүү Кристианстад хотын сургуульд сурагч, багш хоёрыг хутгалж шархдуулсан. 2015 оны 10-р сард Троллхеттан хотын сургуульд арьс өнгөөр ялгаварлан гадуурхсан халдлага гарсан бөгөөд гэмт этгээд сэлэм ашиглаж 3 хүний аминд хүрсэн. Хамгийн сүүлд насанд хүрэгчдийн боловсролын төвд 10 хүн буудуулж амь насаа алдсан зэрэг олныг цочирдуулсан хэргүүд гарсаар байгаа юм.