ЧАРЛЬЗ ГЕРБА: СУПЕРМАРКЕТ БОЛ НЯН, БАКТЕРИ ХАМГИЙН ИХ ҮРЖДЭГ ГАЗАР

Хүн бүр нийтийн бие засах газар орсны дараа гараа угаахаа мартадаггүй. Гэвч хүнсээ цуглуулсны дараа хүмүүс гараа угаах нь тийм ч түгээмэл биш. Гэтэл супермаркетууд ариун цэврийн өрөөнөөсөө ч илүү бактери үржих таатай орчин болдог байна. Коронавирусийн цар тахлын үеэр олон нийтийн газар гар ариутгагч болон ариутгалын алчуур өргөн хэрэглэгдэж байсан. Одоо ч гэсэн энэ арга хэмжээг үргэлжлүүлэх хэрэгтэй гэж микробиологич профессор Чарльз Герба “Tages Anzeiger” сонинд өгсөн ярилцлагадаа онцолжээ. Мөн тэрээр “Худалдааны тэрэгний бариулууд нийтийн бие засах газрынхаас илүү их өтгөний нян агуулдаг” гэдгийг онцолжээ.

Учир нь супермаркетуудын ариун цэврийн өрөөг тогтмол цэвэрлэгддэг бол, худалдааны тэрэг, сагсууд тийм биш юм. Судалгаанаас үзэхэд бариул дээр салмонелл болон E.coli зэрэг олон төрлийн хортой нянгууд илэрсэн байна. Үүнээс гадна жинлүүр, өөртөө үйлчлэх кассын товчлуурууд, карт уншигчийн PIN код оруулах хэсэг зэрэг байнга хүрэлцдэг гадаргуу дээр ч маш их хэмжээний нян агуулагддаг байна. Үүнээс хамгаалахын тулд дараах арга хэмжээг тогтмол авах хэрэгтэй:

📌 Ариутгалын алчуур авч явах (багадаа 60% спиртийн агууламжтай байх)

📌 Худалдааны тэрэг, сагс зэргийг хэрэглэхийн өмнө арчих

📌 Худалдааны дараа гараа угаах

📌Жимс, хүнсний ногоог сайтар угааж хэрэглэх

📌 Өөрийн авч явдаг сагс, уут, цүнхийг тогтмол цэвэрлэх хэрэгтэй. Та дээрхи жижиг дадлуудыг хэвшүүлснээр хүнсээ аюулгүй орчноос худалдан авч, эрүүл мэндээ хамгаалах боломжтой.