УЛААН ӨНДӨГНИЙ БАЯР ИХЭВЧЛЭН ЖИЛ БҮРИЙН 3.22-ООС 4.25-НЫ ХООРОНД ТОХИОДОГ

Улаан өндөгний баяр бол дэлхийн бүх Христэд итгэгчдийн хувьд хамгийн чухал баяр юм. Улаан өндөгний баярын олон янзын ёс заншил, уламжлал байдаг. Есүс загалмайд цовдлуулан нас бараад гурав дахь өдрөө дахин амилсан нь тус баярыг өнөөдөр хүртэл тэмдэглэх учир шалтгаан болжээ. Баярын гол утга санаа нь “Бүх зүйл үхлээр дуусдаггүй” гэсэн үгээр тайлбарлагдаж болдог байна. Улаан өндөгний баярын өдөр хаврын анхны тэргэл сарны дараах ням гарагт буюу ихэвчлэн Григорийн тооллын дагуу 3 сарын 22-оос 4-р сарын 25-ны хооронд тохиодог байна.

Өнгө өнгөөр будсан өндөг, шоколадан туулай, улаан өндөгний баярын гал буюу лаа нь үндсэн бэлэг тэмдэг юм. Будаж чимэглэсэн баярын өндөг нь үржил шим, шинэ амьдралын бэлэг тэмдэг бөгөөд амьдралын олон өнгийг төлөөлөн буддаг ажээ. Баярын лаа буюу гал нь амьдралыг тэтгэж, дулааныг ялгаруулдаг гэдгээр нь тус баярын нэг хэсэг болдог байна. Хачирхалтай нь баярын бэлэг тэмдэг амьтан нь улс бүрд өөр өөр байдаг. Жишээ нь Герман улсад туулай нь баярын өндгийг авчирсан гэж үздэг бол Швейцарт баярын өндгийг туулай биш хөхөө шувуу авчирсан гэх жишээтэй. Мөн бүс нутгаас хамааран үнэг эсвэл өрөвтас зэрэг бусад амьтадыг бэлэг тэмдэг болгон тэмдэглэдэг байна. Гэхдээ туулай нь хамгийн алдартай.

Сонирхуулахад 2007 онд дуудлага худалдаагаар улаан өндөгний баярын өндөг 12.5 сая еврогийн үнэ хүрч байжээ. Тус өндөг нь эрдэнийн чулуугаар чимэглэсэн 11 см жижиг, ойролцоогоор 3600 грамм жинтэй байжээ.