ОХУ 2011 ОНООС ХОЙШИХ ХАМГИЙН ӨНДӨР ТООНЫ ЦЭРЭГ ТАТЛАГА ЭХЛҮҮЛЛЭЭ

ОХУ-ын Ерөнхийлөгч Владимир Путин 18-30 насны 160,000 эрэгтэйг нэг жилийн хугацаатай цэргийн албанд татах зарлиг гаргалаа. Энэ нь 2011 оноос хойших хамгийн өндөр тооны цэргийн татлага болж байна. Энэхүү хаврын татлага нь Оросын армийн нийт бие бүрэлдэхүүнийг 2.39 сая, үүнээс 1.5 саяыг идэвхтэй албан хаагч болгох зорилготой юм.

Оросын Батлан хамгаалах яамны төлөөлөгч, дэд адмирал Владимир Цимлянский шинэ татагдагсдыг Украины “тусгай цэргийн ажиллагаа”-нд илгээхгүй гэж мэдэгдсэн боловч өмнөх мэдээллүүдээр зарим цэргүүд Украины хил орчмын тулалдаанд оролцож, амь үрэгдсэн тохиолдлууд гарч байсан. Орос улс жилд хоёр удаа, хавар болон намрын улиралд цэргийн татлага явуулдаг бөгөөд энэ удаагийн 160,000 хүний татлага нь 2024 оны мөн үеийнхээс 10,000-аар илүү байна. Өнгөрсөн оноос эхлэн татлагад хамрагдах насны дээд хязгаарыг 27-оос 30 болгож нэмэгдүүлсэн юм.