ЕХ: АЛИВАА ГАМШИГ, ДАЙНЫ ЭРСДЭЛД ӨРХ БҮР 72 ЦАГ ТЭСЭХ ЗӨВЛӨМЖИЙГ ГАРГАЖЭЭ

Европын Комиссийн Ерөнхийлөгч Урсула фон дер Лайен лхагва гарагт Европын орнуудад бэлэн байдлын шинэ стратегийг танилцуулахдаа: Европт илүү өндөр түвшний бэлэн байдлыг энэ цаг үе өөрөө шаардаж байна” гэж онцоллоо. Мөн шуурхай хэрэгжүүлэх 30 арга хэмжээг дурдсан юм. Үүний хүрээнд Европын Холбооны гишүүн орнууд өрх бүр гишүүдийн тооноос үл хамааран онцгой байдлын үед бие даан тэсэж үлдэх 72 цагийн хүнс болон бусад хэрэгслийн нөөцтэй байх хэрэгтэйг уриалахыг зөвлөж байгаа юм. Онцгой байдал гэдэг нь зэвсэгт мөргөлдөөнөөс гадна кибер халдлага, хөндлөнгийн оролцоо, байгалийн гамшиг зэрэг эрсдэлүүдийг нэрлэжээ.

Харин Германд гамшгийн үед бэлэн байх албан ёсны удирдамж байдаг гэдгийг онцолж жишээ болгон дурджээ. Тодруулбал Германы Холбооны Иргэдийн хамгаалалт, гамшгаас хамгаалах газрын зөвлөснөөр иргэд 10 хоногийн турш дэлгүүр явахгүйгээр амьдрах боломжтой хүнсний болон ахуйн нөөцийг бэлтгэх хэрэгтэй.

Нөөцийн жагсаалт:

• Хүн нэг бүр 10 хоногийн турш өдөрт 2200 ккал авах хэмжээний хүнс

• 20 литр ус

• 3.5 кг үр тариа, төмс, эсвэл будаа

• 4 кг лаазалсан ногоо, шош, буурцаг

• 2.5 кг жимс

• 2.6 кг сүүн бүтээгдэхүүн

• 1.5 кг мах, загас, өндөг

• Хувийн ариун цэврийн хэрэглэл, эм тариа, баримт бичиг, хувцас, хутга, нойрны уут агуулсан яаралтай тусламжийн цүнх багтдаг байна. Энэ нь Европын Холбооны шаардлагаас илүү өндөр түвшин юм.