ЕРӨНХИЙЛӨГЧ АСАН Ц.ЭЛБЭГДОРЖ УКРАИНЫ ЕРӨНХИЙЛӨГЧ В.ЗЕЛЕНСКИЙТЭЙ УУЛЗЖЭЭ.

МУ-ын ерөнхийлөгч асан Ц.Элбэгдорж өнгөрсөн долоо хоногийн баасан гарагт ХБНГУ-ын Мюнхен хотод болсон аюулгүйн хуралд оролцсон тухайгаа өөрийн твиттерт жиргэжээ.

БАВААРЫН ТЭНГЭР ДООР

Далай гаталсан унаа, борооны ус зүсэн Мюнхений нисэхийн шальдар булдар буудалд газардлаа.

Энэ удаагийн Мюнхений хурлын голлох сэдэв нь Украйн мэдээж Цагаан ордны шинэ эзэн. АНУ-аас Дэд Ерөнхийлөгч нь төлөөлөгчдөө ахалж оролцсон. Чуулганд хэлэх үг нь анхаарал гойд татаж байлаа. НАТО, Украйн, дайны талаар бараг дурсахгүй өнгөрөв. -Үг хэлэх эрх чөлөө, сонгууль, дүрвэгсэд... гээд жишээ татан ярив. Олон хүний нүдийг томруулж, бас дургүйг хүргэж, шуугиулж орхив. Европ Америк хоёрын хооронд зарим асуудлаар бээрийн хиртэй ангал үүсчээ. Үгэн дотроос үг, санаан дотроос санаа хайсан л хүмүүс. Сэм өвөөгийн сонгууль Европт үргэлжилж байгаа мэт.

-Ачаагаа шилжүүлж ачихад хэдхэн хоног үлдлээ. Засагт шинэ хүмүүс ирэх ч удахгүй хөрсөн дээрээ бууна. Бидний уулзахгүйтэй уулзаж, хүрэхгүй газар хүрдэг хүмүүс, Та нарын бодол юу байна гэж цаасан малгай өмсүүлэн Германы сайд яриагаа эхэллээ. Англи, Герман, Франц гээд Европын гурвалыг тойрч бид албаны хэсэг хүнтэй уулзсан юм. НҮБ гэснээс биднийг Аюулгүйн Зөвлөлийн шинэчлэлийн асуудлаар зуучилж ажиллах урилга санал хоёр ч газраас ирлээ. -Эзэд нь найрсаг, дарс нь шимтэй бол тэтгэврийн бид татгалзах юу байхав гэж манай ахлагч хариу барилаа.

Зеленскии. Дайны өмнөхөн бол хэн юм бол гэх мэдрэмж төрдөг байв. Одоо харин үг үйлдэл бүр нь дэлхийн хараа анхаарал татдаг содон нэгэн. Европ, Америк, Орос, Хятад, Энэтхэг, Япон, Араб, Бразил, НАТО, НҮБ, ЕХ, сум зэвсэг, талх хүнс гээд түүний үг, уулзалтаас олон үйл явдлын өрнөл хамаарч байна. Өнөөдөр Европт маргааш Азид гарч болох асуудал. Сэтгэл нь хөдөлж, хоолой нь зангирч байгаа бололтой. Алгаа таших нь байтугай, хүн рүү эхэлж гараа сунгахдаа харам эрхэмүүд дуу алдан алдан нижигнүүлж байдаг шүү. Зеленскиин оронд хэн ч өөрийгөө тавиад харсан сэтгэл хөдлөхөөр. Олон улсад ийм нэр нүүртэй, алдар хүндтэй нэг хүнтэй байхад жижиг том аль ч оронд адилхан зүйрлэшгүй баялаг юм. Их зүтгэл, зориг авъяас, ухаан чадвар шаардах ажил. Зеленскии уг шалгуурыг давж гарсан, сандал суудалдаа элбэгхэн тэнцсэн бөмбөрцөгийн манлайлагч болж чаджээ. Тэрээр ямар ч улс гүрэн, дарангуйлагч ардчилагч хэн ч бай эцсийн эцэст эрх ашгаа л боддог болохыг. Украйныг Украйн л хамгаална, босгоно гэдгийг ойлгохын дээдээр ойлгожээ. Мундаг ч нүүдэл хийх юм. Тавхан алхамын наана цаанаас үг яриаг нь сонслоо.

-Украйны асуудлыг Украйнгүйгээр шийдэхгүй. МараЛаго руу салж гүйлдэхээ болъё, хамтдаа байя, бид задарвал бусдын идэш болно, Европ өөрийн Зэвсэгт хүчнээ босгоё гэх санааг олны зүрхэнд тэр суулгаж өглөө. Европын хорин долоон орныг Америк, Оросын өөдөөс нэгтгэж байгаа бараг цорын ганц шалтгаан нь Украйн болж чаджээ. Мянга гурван зуун километрийн өргөн фронтод хол ойроос зэвсэглэн довтлох хүчийг зогсоож устгаж байгаа арми, ард түмэн түүний ард байна. Өнгөрсөн жил гэхэд л Украйн сая гурван зуун дрон дангаараа үйлдвэрлэж ашиглажээ. -Оросын гурван сар тутам гаргаж байгаа сум зэвсгийн тоо Европын бүх орон нийлээд нэг жилд хийдгээс их байна гэж саяхан ажлаа авсан НАТО-гийн дарга хэлж байв. Ийм армийг сульдаах хүч Украйнд хэдийн бий болж. Энэ хүн улсынхаа жинтэй тэнцэх хүнд ачааг үүрч, нэр нүүрийг нь улайлгахгүй ажилдаа жинхэнэ ёсоор эзэн болж чадаж байна.

МЦЭ. Цөмийн зэвсгийн аюулаар хийсэн хэлэлцүүлэг болон Мюнхений хурлыг зохион байгуулагчдын тусгай зоогт уригдаж хоёр удаа үг хэллээ. Нэг танхим нь гайхширч нөгөө заал нь нижигнэтэл алга ташиж хүлээж авлаа. Хоёр дугаар дайнаас хойш нэг хэсэг тайвширсан далайд их шуурга нэгэнт босжээ. Хаана очиж зогсохыг мэдэх толгой алга. Харин бидний сууж яваа хөлөг Европ Ази, Америк Африк ялгалгүй хуучирч мууджээ. Гүнзгий ан цав цууралт өгч. Халтар саарал өнгө хаа сайгүй давамгайлах аж. Өөрчилж янзлах, шинээр бүтээх дагуулах хошуучлагчид цөөхөн болж. Зүгээ олохгүй төөрөлдөгсөд бас ядуурал зовлонгоор ашиг хийгч хүний адгууд их олширчээ...

-Таны нисэх цаг боллоо гэсээр унаа зохицуулж байгаа залуу хаалга тогшлоо. Өглөө босоод гурав дахь уулзалтаа хийж суугаа нь энэ. Нөхөдтэйгээ тэврэлдэж баяртай гэсээр яаран машинд суулаа. Жолооч залуу -Таныг амжиж хүргэнэ гээд хурдлан давхив. Онгоцны буудалд богино үстэй Герман бүсгүй тосож урд орон гүйв. Шалгалт, хүлээлт алгасч чавхдасаар Сан руу нисэх онгоцны хаалган дээр сүүлчийн зорчигч болж ирэв. Тусалсан бүсгүй "амжлаа" гэсээр хөлсөө арчлаа.

Мюнхенд ирэхэд муухайрч байсан тэнгэр цэлмэжээ. Баваарын тэнгэрийн хаяанаас нар баавартай гээч нь хөөрч байв.

2025 оны 2 дугаар сарын 18.