ЕВРОПЫН ОРУУДЫН ВИЗ ГАРГАЖ ӨГНӨ ГЭХ ХУУРАМЧ ЗАРУУД ИХСЭЖ БАЙНА

Сүүлийн үед цахим орчинд Европын орнуудад ажлын гэрээгээр ажилд зуучилна, удаан хугацааны оршин суух виз гаргаж өгнө гэх хуурамч зарууд олширч, үүнд залилуулах иргэдийн тоо нэмэгдэж байна.

Энэ төрлийн залиланд өртөхөөс хэрхэн сэргийлэх вэ?

✅ Албан ёсны эх сурвалжаас мэдээлэл авах: Европын орнуудын цагаачлал, хөдөлмөрийн байгууллагуудын албан ёсны вэбсайт, Элчин сайдын яам, консулын газраас л виз болон ажиллах зөвшөөрлийн талаарх мэдээлэл авах хэрэгтэй.

✅ Амлалтанд хэт итгэхгүй байх: “Хялбар аргаар ажилд оруулна”, “Гэрээгүйгээр ажиллах боломжтой”, “Виз асуудалгүй гаргаж өгнө” гэх мэт амлалт бүхий зарууд ихэвчлэн залилан байдаг.

✅ Зуучлалын байгууллагын найдвартай эсэхийг шалгах: Албан ёсны бүртгэлтэй, зөвшөөрөлтэй хөдөлмөр зуучлалын байгууллагаас өөр газраас үйлчилгээ авахгүй байх.

✅ Гэрээ, бичиг баримтаа нягтлах: Хэрэв зуучлагч байгууллага эсвэл хувь хүн ямар нэгэн ажиллах санал тавьж байгаа бол гэрээний нөхцөл, компанийн мэдээллийг сайтар судлах шаардлагатай.

✅ Урьдчилгаа төлбөр өгөхгүй байх: Албан ёсны ажлын саналын хувьд урьдчилгаа төлбөр шаардах ёсгүй. Зуучлалын хураамжийг зөвхөн хуулийн дагуу гэрээ байгуулсны дараа төлөх ёстой.

✅ Бусад хүмүүсийн туршлагаас суралцах: Өмнө нь ийм залиланд өртсөн хүмүүсийн туршлагыг судалж, сэжигтэй схемүүдийг таньж мэдэх нь чухал.