ГЕРМАНААС ПИВОНЫ ШИЛ, АВДАРЫГ АВЧ, АВСТРИ УЛСАД ТУШААХ ТОХИОЛДОЛ ИХЭСЖЭЭ

Герман Австрийн хилээр хоосон пивоны шил гаргах тээвэрлэлт нэмэгдээд байна. Учир нь Австрийн шар айраг үйлдвэрлэгчид олон дахин ашиглагддаг шилэн савны барьцааг 9 центээс 20 цент болгон нэмэгдүүлж, шилний авдарын барьцааг Германтай харьцуулахад 2 дахин өндөр буюу 3 евро болгожээ. Австрийн тус шийдвэрийн зорилго нь жил бүр шар айргийн шилний 6 хувь нь хаягдал болон байгальд орхигддог тул, “хүмүүсийг шилээ буцааж өгөхийг урамшуулах” зорилгоор ийм арга хэмжээ авсан гэж Австрийн Шар айраг үйлдвэрлэгчдийн холбооны (Brauereiverband) төлөөлөгч Флориан Бергер тайлбарлажээ.

Германд эсвэл Австрид зарагдсан гэдгийг шилнээс ялгаж таних боломжгүй тул хүмүүс энэ боломжийг ашиглан хил дамнан барьцааны мөнгөөр ашиг олох үйлдэл хийж эхэлсэн байна. Германы Бавар мужийн Schönramer шар айрагны үйлдвэрийн Кристиан Тийл хэлэхдээ: Зарим хүмүүс шар айраг үйлдвэрлэгчид болон худалдаачдын хохироох байдлаар ашиг олж байна. Бүтэн чиргүүл дүүрэн хоосон шил хил давуулах тохиолдол ч гарчээ. Үүнээс хоёр улсын хил дээрх худалдаачид хамгийн их хохирол амсаж байгаа бөгөөд нэг талаас Германы үйлдвэрүүдэд шилний хомсдол үүснэ нөгөө талаас Герман улсаас шар айргийн хайрцаг худалдан аваад, Австрид очиж буцаавал, Австрийн үйлдвэрүүд 3.90 еврогийн хохирол амсах юм. Тиймээс Германд шар айргийн шилний барьцаа 8 центийн үнэлгээг нэмэх талаар хэлэлцэж эхэлсэн байна. Энэ асуудалд Германы шар айраг үйлдвэрлэгчид болгоомжтой хандаж байгаа бөгөөд хэрэглэгчдийн зүгээс үнэ өссөн гэж бодож магадгүй гэ болгоомжлол үүсээд байна.