АЛДАРТ ЛУВРЫН МУЗЕЙД "LOUVRE COUTURE" ХУВЦАС ЗАГВАРЫН ҮЗЭСГЭЛЭН АНХ УДАА

Парисын алдарт Луврын музейн үзвэрийн танхимд анх удаа томоохон хувцас загварын үзэсгэлэн гарлаа. Францын хувцас загварын агентлагууд Луврын талбайд олон удаа шоу зохион байгуулж байсан ч музейн үзэсгэлэнгийн танхимд үзэсгэлэн гаргаж байгаа анхны тохиолдол болж байна.

John Galliano-ийн 2006–2007 оны Dior брэндийн Couture Kollektion

Дэлхийн хамгийн их үзэгчтэй музей болох Лувр анх удаа Chanel, Saint Laurent, Dior зэрэг алдартай брэндүүдийн загварууд болон гоёл чимэглэлийг эртний Грекийн урлал, Францын хоёрдугаар эзэнт гүрний урлагийн бүтээлүүдийн хажууд дэлгэн харуулж байна. “Louvre Couture” үзэсгэлэнгийн нээлтийн үеэр урлаг судлаач Oliver Gabet Парис бол загварын нийслэл. Дэлхийн хувцас загварын томоохон орднууд болон Парис хотын хооронд маш хүчтэй холбоо бий гэж “Reuters” агентлагт ярьжээ.

Луврын музейн XIV Людовик хаанд зориулсан өрөөний тансаг алтлаг тавилга, хааны том хөргүүдийн дунд үзэсгэлэнгийн гол загвар болох дизайнер John Galliano-ийн 2006–2007 оны Dior брэндийн Couture Kollektion-д зориулан бүтээсэн шөнийн үдэшлэгийн даашинзыг байрлуулжээ. Мөн өөр нэг танхимд Alexander McQueens-ийн 2011 оны “Armadillo” хэмээх өндөр өсгийт гутлыг 17-р зууны шаазан тавагтай хослуулан үзүүлсэн байна.

Louvre Couture: Урлаг ба Загвар үзэсгэлэн 2025 оны 7-р сарын 21-нийг хүртэл тавигдана.