ФРАНЦ УЛС
Франц нь ерөнхийлөгчийн хагас засаглалтай бүгд найрамдах улс. Тус улсын одоогийн төрийн тэргүүнүүд бол Эмманюэль Макрон. Франц улс үндсэн эх газраасаа гадна Өмнөд Америк тив, Атлантын далай, Номхон далай болон Энэтхэгийн далайд өөрийн эзэмшил газар нутаг болон орнуудтай. Франц улсын хүн амын нийт тоо 67.5 сая бөгөөд тэдний 93 хувийг франц үндэстний хүмүүс бүрдүүлдэг. Харин шашны хувьд нийт францчуудын 51 хувь нь христийн шашныг шүтдэг бол 40 хувь нь ямар нэгэн шашин шүтлэггүй. Өмнөд Америк тивд байрлах Францын Гайана улсыг албан ёсоор Франц улсын мэдэлд байдаг гэдгийг хүн бүр мэдээд байдаггүй.
ТӨРИЙН ДАЛБАА
Франц улсын төрийн далбаа цэнхэр, цагаан, улаан гэх гурван өнгийн ижил хэмжээтэй босоо зурааснуудаас бүрддэг. Цэнхэр өнгө нь францчуудын язгууртан гарлыг, цагаан өнгө нь францчуудын оюун санааг, улаан өнгө нь франц хөрөнгөтнүүдийг тус тус бэлгэддэг. Сонирхуулахад нэг хүнд оногдох дотоодын нийт бүтээгдэхүүнийхээ хэмжээгээр дэлхийд долоодугаар байранд жагсдаг тус улс хүний хөгжлийн индексээрээ 26-аар байранд эрэмбэлэгддэг. Дэлхийн хамгийн өндөр хөгжилтэй орны иргэд гэр бүлийнхээ нийт орлогын хэмжээгээр дэлхийд дөрөвдүгээр байранд бичигддэг.
ХАЙРЫН ХОТ ПАРИС
Франц бол дэлхийн хамгийн олон тооны гадаадын жуулчин хүлээн авдаг улс. Тус улс коронавирус тархахаас өмнө жилд дунджаар 90 сая жуулчин хүлээн авдаг байсан. Мөн Парис хот дахь Луврын музейгээр жил бүр 9 сая жуулчин зочилдог. Энэ музей нь дэлхийн хамгийн олон үйлчлүүлэгчидтэй музей юм. Мэдээж дэлхийн 7 гайхамшгийн нэг Эйфелийн цамхаг “Tour Eiffel” буюу Төмөр Хатагтай нь өнөөгийн Парис хотын бэлэг тэмдэг юм. Түүнийг зохиогч Александр Густав Эйфелийн нэрээр нэрийджээ. Цамхаг Одоогийн байдлаар 200 сая гаруй хүн очиж сонирхдог дэлхий дээр хамгийн их хүн үзсэн төлбөртэй дурсгалын газар. Мөн хосууд зорин очиж хайрын түүхээ нэмдэг. Цамхаг өдөр бүр нээлттэй байдаг. Нэвтрэх дөрвөн цэг байдаг: хойд, өмнөд, баруун, зүүн. Мөн аялал жуулчлалын хоёр ангиллын тасалбартай : дунд хэсэгт гарахад 16 евро, хамгийн дээд хэсэгт гарахад 25 евро. Цамхгийн нэг, хоёрдугаар давхарт буфетууд байдаг бөгөөд жирийн жуулчид 7.5 еврогоор нэг зүсэм пицца, нэг аяга жүүс худалдаж авах боломжтой. Мөн өөр нэгэн мэдээлэл хүргэхэд Франц улсад дэлхийн үнэт өвөөр нэрлэгдэж ЮНЕСКО-д бүртгэгдсэн нийт 28 газар байдаг. Мөн тус улсын зарим кофены газрууд “баярлалаа, талархлаа” гэж хэлээгүй хүмүүсээс худалдан авсан бараанаас нь илүү их төлбөр нэхдэг. Ийм учраас та Франц улсад очих үедээ маш эелдэг байх ёстой. Мөн энэ онд буюу 2024 зуны олимпыг Парис хотод зохион байгуулна.
ФРАНЦЧУУД ӨДӨРТ 8.8 ЦАГ УНТДАГ
Монголчууд бид амралтын өдрүүдэд үд болтол унтаж үхрийн дуунаар сэрлээ гэдэг бол энэ үг Францчуудад илүү тохирох мэт. Учир нь Францчууд бол нойр сайн авахын ач тусыг ихээр үнэлж ач холбогдол ч их өгдөг ард түмэн. Өндөр хөгжилтэй орнуудын иргэд өдөрт дунджаар 5-6 цаг унтдаг гэсэн судалгаатай бол. Францчуудын хувьд ойролцоогоор 8.8 цаг унтацгаадаг гэх үзүүлэлт гарчээ. Харин та өдөрт хэдэн цаг унтдаг бэ?
ФРАНЦЫН СОДОН ХУУЛЬ
Франц улстай холбоотой этгээд баримтуудын нэг бол тус улсад нас барсан хүнтэй гэрлэхийг хүлээн зөвшөөрсөн хууль байдаг. Хэн нэгэн хүн нас барсан хэдий ч амьд байх үедээ хэн нэгэнтэй гэрлэхийг хүлээн зөвшөөрч, хүсэж байсан бол амьд хүн, үхсэн хүнтэй албан ёсоор гэрлэж эхнэр нөхөр болцгоох бүрэн боломжтой. Бас нэгэн содон хууль 2016 оноос хойш Франц улсын дэлгүүрүүд хуулийн дагуу хоол хүнсний хаягдал гаргах боломжгүй болсон. Хоол хүнсний хаягдал болон өлсгөлөн багасгахын тулд Франц улсын засгийн газар уг хуулийг баталсан бөгөөд хүнсний дэлгүүрүүд хугацаа нь дуусах гэж буй бараануудаа сайн дурын үйл ажиллагаа болон хоолны банканд хандивлах ёстой. Аль эсвэл тэд торгуулах болно.
ФРАНЦАД ОЧВОЛ УГААСАА ИДЭХ ХООЛ
Францчууд эмгэн хумс ашиглан олон төрлийн амттай хоолнуудыг хийдэг ба тэд жилийн турш 25,000 тонн эмгэн хумс идэцгээдэг. Эмгэн хумсаар шөл хуурга, шарна чанана амтална түүхий иднэ. Та Францад очвол яаж ч байсан идэх л болно. Мэдээж хэрэг Францчууд бяслаг идэх дуртай ард түмэн. Нийт францчуудын 95 хувь бяслагийг өдөр тутмын хүнсний хэрэглээндээ багтаан хэрэглэдэг ба тэд 1500 гаруй төрөл зүйлийн бяслаг үйлдвэрлэцгээдэг. Франц улс дахь хамгийн алдартай бяслагуудаас жишээ болгон дурдахад Камеберт де Норманди, Бри де Меа, Мюнстер гэх мэт.
ДЭЛХИЙН ХАМГИЙН ТОМ ДУГУЙН УРАЛДААН
Дэлхийн улс орнууд өөр өөрийн гэсэн онцлог уламжлагдан ирсэн тэмцээн уралдаантай. Манай улсын хувьд морь уралдуулах нь бүх ард түмний цэнгэлийн манлай байдаг бол Франц улс дэлхий дээрх хамгийн том дугуйн уралдааныг зохион байгуулдаг. Тур Де Франс гэх уг тэмцээн 1903 оноос хойш жил бүрийн долоодугаар сард уламжлал болон зохион байгуулагдсаар ирсэн. Уг уралдааны барианд орохын тулд дугуйчид 23 өдрийн турш уралдацгаадаг.
БҮХ СПОРТ ЖИГД ХӨГЖСӨН
Франц улс бол бүх спортын төрлүүд жигд, өндөр түвшинд хөгжсөн дэлхий дээрх цөөн хэдэн орнуудын нэг Тус улсад хамгийн алдартай спорт бол хөлбөмбөг. Франц улсын хөл бөмбөгийн үндэсний шигшээ баг дэлхийн чансааны дөрөвдүгээр байранд эрэмбэлэгддэг ба 1998 болон 2018 оны ДАШТ-үүдэд түрүүлж байсан. Франц улс зуны олимпыг хоёр удаа, өвлийн олимпыг мөн хоёр удаа нутаг дээрээ зохион байгуулсан. Франц улсын баг тамирчид зуны олимпоос 223 алт, 251 мөнгө, 277 хүрэл медаль, өвлийн олимпоос 41 алт, 42 мөнгө, 55 хүрэл медалийг тус тус хүртсэн. Мөн Франц улс Энэ онд буюу 2024 зуны олимпыг Парис хотод зохион байгуулна.
